РУССКИЙ  |  O'ZBEKCHA  |  ENGLISH                          

       O'zbekiston Respublikasi Moliya Vazirligi

MUZOKARALAR HAR DOIMGIDEK OʻZARO ISHONCH VA OCHIQLIK MUHITIDA, KONSTRUKTIV RUHDA OʻTDI

19
Okt 2018
348 marta ko'rildi

MUZOKARALAR HAR DOIMGIDEK OʻZARO ISHONCH VA OCHIQLIK MUHITIDA, KONSTRUKTIV RUHDA OʻTDI

Concrete

Davlat rahbarlarining samarali muzokaralari yakunida salmoqli hujjatlar qabul qilindi.

Oʻzbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putin Qoʻshma bayonotni imzoladi.

Bu haqda Oʻzbekiston Respublikasi Prezidenti Matbuot xizmati maʼlum qildi.

Tashrif doirasida imzolangan 2019-2024-yillarda iqtisodiy hamkorlik dasturi, 2019-2021-yillarda madaniy-gumanitar sohalarda hamkorlik dasturi, “Suffa” xalqaro radioastronomik observatoriyasini tashkil etish boʻyicha yoʻl xaritasi, Oʻzbekistonda Rossiyaning yetakchi oliy taʼlim muassasalari filiallarini tashkil etish va faoliyatini taʼminlash toʻgʻrisidagi bitim, Toʻqimachilik sanoatida hamkorlik toʻgʻrisidagi bitim oʻzaro almashildi.

“Mustaqillikning 25 yilligi” konini qoʻshimcha razvedka qilish va jihozlash hamda Surxondaryo viloyatida gaz-kimyo majmuasini qurish boʻyicha “Oʻzbekiston mustaqilligi” investitsiya blokiga doir qoʻshimcha bitim, Oʻzbekiston Respublikasi Prezidenti huzuridagi Davlat boshqaruvi akademiyasi va M.V.Lomonosov nomidagi Moskva davlat universiteti oʻrtasida hamkorlik toʻgʻrisidagi shartnoma, Moskva davlat xalqaro munosabatlar institutining Oʻzbekistondagi filialini tashkil etish toʻgʻrisida bitim, Fanlararo ilmiy taʼlim markazini tashkil etish toʻgʻrisida bitim, Oʻzbekiston oliy taʼlim muassasalari rektorlari kengashi va “Rossiya rektorlar kengashi” jamoat tashkiloti oʻrtasida bitim, Oʻzbekiston Respublikasi Milliy gvardiyasi va Rossiya Federatsiyasi Milliy gvardiya qoʻshinlari Federal xizmati oʻrtasida hamkorlik toʻgʻrisidagi bitim imzolandi.

Tashrif asnosida turli sohalardagi hamkorlikni rivojlantirishga qaratilgan 20 ta hujjat imzolandi.

Ommaviy axborot vositalari uchun brifingda Prezidentlar tor va keng doiradagi muzokaralar har doimgidek oʻzaro ishonch va ochiqlik muhitida, konstruktiv ruhda oʻtganini taʼkidladi. 

Hamkorlikning hozirgi holati va uni har tomonlama rivojlantirish istiqbollari muhokama qilindi, mamlakatlarimizning dolzarb mintaqaviy va xalqaro masalalarga doir yondashuvlari mos yoki yaqin ekani tasdiqlandi.

Mamlakatlarimiz oʻrtasidagi munosabatlar sifat jihatidan yangi bosqichga koʻtarilgani qayd etildi.

Bugungi kunda Rossiyaning mamlakatimiz iqtisodiyotiga yoʻnaltirgan investitsiyalari hajmi 8,5 milliard dollardan oshadi. Tashrif doirasida birinchi bor oʻtkazilgan “Oʻzbekiston-Rossiya” hududlararo forumi bu borada katta ahamiyat kasb etdi. Uning yakunida qiymati 2 milliard dollardan ziyod loyihalar boʻyicha kelishuvga erishilgani qayd etildi.

Tomonlar BMT, MDH, SHHT, YEXHT va boshqa nufuzli xalqaro tuzilmalar doirasida oʻzaro hamkorlikni davom ettirishga tayyor ekanini tasdiqladilar.

Prezidentlar xavfsizlik sohasida oʻzaro ishonch va manfaatlarni hisobga olish prinsiplariga asoslangan sheriklik munosabatlarini kengaytirish Markaziy Osiyo mintaqasidagi yangi tahdid va xatarlarga qarshi kurashish vazifalarini birgalikda hal etishga xizmat qilishini taʼkidladi.

Terrorizm, ekstremizm, ayniqsa, yoshlar orasida radikallashuvga qarshi kurashish boʻyicha saʼy-harakatlarni muvofiqlashtirish yuzasidan fikr almashildi.

Tomonlar Afgʻonistonda tinchlikni afgʻonlarning oʻzi, afgʻonlar rahbarligida oʻrnatishi zarurligiga ishonch bildirdi. Rossiya Oʻzbekistonning Afgʻonistonda tinchlik jarayoniga koʻmaklashish borasidagi muhim saʼy-harakatlarini yuqori baholadi.

Davlat rahbarlari Markaziy Osiyoda oʻzaro manfaatli va samarali mintaqaviy hamkorlik rivojida ijobiy tendensiyalar kuzatilayotganini taʼkidladi.

Fan, taʼlim, sogʻliqni saqlash va turizm sohalaridagi aloqalarni rivojlantirishga ustuvor ahamiyat qaratildi. Joriy oʻquv yilidan Olmaliq shahrida Moskva poʻlat va qotishmalar instituti filiali ish boshladi. Mamlakatimizda samarali faoliyat yuritayotgan Moskva davlat universiteti, Rossiya iqtisodiy akademiyasi, Rossiya davlat neft va gaz universiteti filiallariga qoʻshimcha ravishda Moskva davlat xalqaro munosabatlar instituti, “MMFI” milliy tadqiqot yadro universiteti, Rossiya davlat kinematografiya instituti, Moskva energetika instituti, Rossiya kimyo-texnologiya universiteti filiallarini ochish rejalashtirilgan.

Fan sohasida oʻzaro hamkorlikni faollashtirish, jumladan, Jizzax viloyatidagi Suffa platosida yirik radioteleskop tashkil etish loyihasini amalga oshirish boʻyicha kelishuvga erishildi.

Xalqlarimizni yanada yaqinlashtirish maqsadida mamlakatimizda Oʻzbekiston-Rossiya yoshlari forumi toʻrtinchi bor oʻtkaziladi.

Davlatimiz rahbari yana bir muhim masalaga toʻxtaldi. 2020-yilda Ikkinchi jahon urushidagi gʻalabaning 75 yilligini munosib nishonlash maqsadida mamlakatimizda maxsus dastur ishlab chiqish va Toshkentda “Gʻalaba” bogʻ-majmuasini tashkil etish rejalashtirilmoqda. Ushbu maskan fashizmga qarshi kurashimiz ramzi boʻladi, yosh avlodni tarixga hurmat, vatanparvarlik va xalqlar doʻstligi ruhida tarbiyalashga xizmat qiladi.

Tomonlar Rossiya Prezidentining Oʻzbekistonga davlat tashrifi mamlakatlarimiz oʻrtasida strategik sheriklik va ittifoqchilik ruhidagi keng koʻlamli hamkorlikni yanada rivojlantirishga kuchli surʼat bagʻishlashiga ishonch bildirdi.

Ma'lumot manbai: uza.uz

Izoh qoldiring

Make sure you enter the (*) required information where indicated. HTML code is not allowed.

Biz ijtimoiy tarmoqlarda

Ishonch telefoni bo'yicha murojaatlar statistikasi

Paris

Vazirlikka kelgan xatlar holatini ko'rish

Yangiliklar taqvimi

« Dekabr 2019 »
Dush Sesh Chor Pay Jum Shan Yak
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31          

Axborot-hisoblash markazining tezkor aloqa raqami (0-371) 202 03 02

Moliya vazirligi Axborot-hisoblash markazining "UzASBO va "DMBAT" dasturiy majmualari bo'yicha "Tezkor aloqasi"

Statistika

Hozir 466 mehmonlar va ro'yxatdan o'tgan foydalanuvchi yo'q saytda

Arxiv

Ishonch telefonlariga bo'lgan qo'ng'iroqlarni baholash statistikasi

Agar siz matnda xatoliklarni aniqlasangiz, sichqoncha bilan belgilab, administratorni xabardor qilish uchun Ctrl+Enter tugmalarini bosing

© 2019 O'zbekiston Respublikasi Moliya vazirligi. Barcha huquqlar himoyalangan. Saytdan olingan
ma'lumotlardan foydalanilganda O'zbekiston Respublikasi Moliya vazirligining rasmiy veb sayti 
www.mf.uz ko‘rsatilishi shart. Saytni ishlab chiqish va qo'llab-quvvatlash Moliya vazirligi AHM tomonidan amalga oshiriladi

DMC Firewall is developed by Dean Marshall Consultancy Ltd